ਨਵੀਂ ਦਿੱਲੀ : ਭਾਰਤ ਆਪਣੀ ਜ਼ਰੂਰਤ ਦਾ ਲਗਭਗ 85 ਫੀਸਦੀ ਕੱਚੇ ਤੇਲ ਦੀ ਦਰਾਮਦ ਕਰਦਾ ਹੈ। ਦੇਸ਼ ਦਾ ਬਹੁਤ ਸਾਰਾ ਪੈਸਾ ਇਸ ਦੇ ਆਯਾਤ ਵਿੱਚ ਜਾਂਦਾ ਹੈ। ਇਸ ਬੋਝ ਨੂੰ ਘੱਟ ਕਰਨ ਲਈ ਸਰਕਾਰ ਨਵੇਂ-ਨਵੇਂ ਤਰੀਕੇ ਲੱਭ ਰਹੀ ਹੈ। ਦੇਸ਼ ਵਿੱਚ ਐਕਸਪ੍ਰੈਸਵੇਅ ਬਣਾਏ ਜਾ ਰਹੇ ਹਨ ਜਿਸ ਨਾਲ ਸਮੇਂ ਦੀ ਬੱਚਤ ਹੋਵੇਗੀ, ਈਂਧਨ ਦੀ ਖਪਤ ਘੱਟ ਹੋਵੇਗੀ ਅਤੇ ਵਾਤਾਵਰਣ ਦੀ ਰੱਖਿਆ ਵੀ ਹੋਵੇਗੀ। ਇਸ ਦੇ ਨਾਲ ਹੀ ਸਰਕਾਰ ਨੇ ਪੈਟਰੋਲ ‘ਚ ਈਥਾਨੌਲ ਦੀ ਮਿਲਾਵਟ ਕਰਨ ਦੀ ਵੀ ਅਭਿਲਾਸ਼ੀ ਯੋਜਨਾ ਬਣਾਈ ਹੈ। ਪੈਟਰੋਲ ‘ਚ ਈਥਾਨੋਲ ਦੇ 10 ਫੀਸਦੀ ਮਿਸ਼ਰਣ ਦਾ ਟੀਚਾ ਪੰਜ ਮਹੀਨੇ ਪਹਿਲਾਂ ਹੀ ਹਾਸਲ ਕਰ ਲਿਆ ਗਿਆ ਸੀ। ਹੁਣ ਇਸ ਨੂੰ ਵਧਾ ਕੇ 20 ਫੀਸਦੀ ਕਰਨ ਦੀਆਂ ਤਿਆਰੀਆਂ ਚੱਲ ਰਹੀਆਂ ਹਨ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਸੋਮਵਾਰ ਨੂੰ ਬੈਂਗਲੁਰੂ ਵਿੱਚ ਇੰਡੀਆ ਐਨਰਜੀ ਵੀਕ ਵਿੱਚ E20 ਪੈਟਰੋਲ (20 ਫੀਸਦੀ ਈਥਾਨੌਲ ਬਲੈਂਡਡ ਪੈਟਰੋਲ) ਦੀ ਵਿਕਰੀ ਦੀ ਸ਼ੁਰੂਆਤ ਕਰਨਗੇ। ਇਸ ਦੇ ਨਾਲ ਹੀ ਦੇਸ਼ ਦੇ 67 ਪੈਟਰੋਲ ਪੰਪਾਂ ‘ਤੇ ਇਸ ਦੀ ਵਿਕਰੀ ਪਾਇਲਟ ਆਧਾਰ ‘ਤੇ ਸ਼ੁਰੂ ਹੋਵੇਗੀ। ਇਸ ਨਾਲ ਤੇਲ ਦੀ ਦਰਾਮਦ ਘਟਣ ਦੇ ਨਾਲ-ਨਾਲ ਵਾਹਨਾਂ ਦੀ ਨਿਕਾਸੀ ਵੀ ਘਟੇਗੀ।
ਬੈਂਗਲੁਰੂ ਵਿੱਚ 6 ਤੋਂ 8 ਫਰਵਰੀ ਤੱਕ ਇੰਡੀਆ ਐਨਰਜੀ ਵੀਕ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਇਕ ਅਧਿਕਾਰੀ ਨੇ ਦੱਸਿਆ ਕਿ ਪ੍ਰਧਾਨ ਮੰਤਰੀ ਨੋਜ਼ਲ ਨੂੰ ਦਬਾ ਕੇ ਇਸ ਦੀ ਵਿਕਰੀ ਸ਼ੁਰੂ ਕਰਨਗੇ। ਇਸ ਨਾਲ ਦੇਸ਼ ਭਰ ਦੇ 67 ਪੈਟਰੋਲ ਪੰਪਾਂ ‘ਤੇ ਪਾਇਲਟ ਆਧਾਰ ‘ਤੇ ਇਸ ਦੀ ਵਿਕਰੀ ਸ਼ੁਰੂ ਹੋ ਜਾਵੇਗੀ। ਉਨ੍ਹਾਂ ਦੱਸਿਆ ਕਿ ਸਾਲ 2014 ‘ਚ ਪੈਟਰੋਲ ‘ਚ 1.4 ਫੀਸਦੀ ਈਥਾਨੋਲ ਬਲੇਡਿੰਗ ਸ਼ੁਰੂ ਕੀਤੀ ਗਈ ਸੀ। ਨਵੰਬਰ 2022 ਲਈ 10 ਫੀਸਦੀ ਮਿਸ਼ਰਣ ਦਾ ਟੀਚਾ ਰੱਖਿਆ ਗਿਆ ਸੀ ਪਰ ਇਹ ਪੰਜ ਮਹੀਨੇ ਪਹਿਲਾਂ ਹੀ ਹਾਸਲ ਕਰ ਲਿਆ ਗਿਆ। 20 ਫੀਸਦੀ ਮਿਸ਼ਰਣ ਦਾ ਅਸਲ ਟੀਚਾ 2030 ਸੀ ਪਰ ਇਸ ਨੂੰ ਪਹਿਲਾਂ 2025 ਅਤੇ ਹੁਣ 2023 ਕਰ ਦਿੱਤਾ ਗਿਆ ਹੈ। ਅਸੀਂ ਇਸ ਨੂੰ ਕਈ ਮਹੀਨੇ ਪਹਿਲਾਂ ਬਾਜ਼ਾਰ ‘ਚ ਲਾਂਚ ਕਰ ਰਹੇ ਹਾਂ।
ਅਧਿਕਾਰੀ ਨੇ ਕਿਹਾ ਕਿ ਸਰਕਾਰ ਦੇਸ਼ ‘ਚ ਊਰਜਾ ਬਚਾਉਣ ਲਈ ਕਈ ਮੋਰਚਿਆਂ ‘ਤੇ ਕੰਮ ਕਰ ਰਹੀ ਹੈ। ਇਹਨਾਂ ਵਿੱਚ ਈਥਾਨੌਲ ਬਲਡਿੰਗ ਪ੍ਰੋਗਰਾਮ ਸ਼ਾਮਲ ਹੈ। ਜਿਸ ਗਤੀ ਨਾਲ ਇਸ ਪ੍ਰੋਗਰਾਮ ਨੂੰ ਲਾਗੂ ਕੀਤਾ ਜਾ ਰਿਹਾ ਹੈ, ਉਹ ਸਵੱਛ ਊਰਜਾ ਤਬਦੀਲੀ ਅਤੇ ਜਲਵਾਯੂ ਪ੍ਰਤੀ ਸਰਕਾਰ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ। ਇਸ ਮੌਕੇ ਪ੍ਰਧਾਨ ਮੰਤਰੀ ਦੇਸ਼ ਵਿੱਚ ਵਿਕਸਤ ਕੀਤੇ ਗਏ ਸੋਲਰ ਇਲੈਕਟ੍ਰਿਕ ਕੁੱਕਟੌਪ ਨੂੰ ਵੀ ਲਾਂਚ ਕਰਨਗੇ। ਇਸ ਨਾਲ ਲੋਕਾਂ ਨੂੰ ਖਾਣਾ ਬਣਾਉਣ ਲਈ ਘੱਟ ਕਾਰਬਨ ਅਤੇ ਸਸਤਾ ਵਿਕਲਪ ਮਿਲੇਗਾ। ਇਸਨੂੰ ਇੰਡੀਅਨ ਆਇਲ ਦੇ ਆਰ ਐਂਡ ਡੀ ਵਿੰਗ ਦੁਆਰਾ ਵਿਕਸਿਤ ਕੀਤਾ ਗਿਆ ਹੈ। ਇਹ ਇੱਕ ਆਧੁਨਿਕ ਇੰਡਕਸ਼ਨ ਕੁੱਕਟੌਪ ਵਰਗਾ ਹੈ। ਇਹ ਸੋਲਰ ਅਤੇ ਗਰਿੱਡ ਪਾਵਰ ‘ਤੇ ਕੰਮ ਕਰਦਾ ਹੈ।
ਕੇਂਦਰੀ ਪੈਟਰੋਲੀਅਮ ਅਤੇ ਕੁਦਰਤੀ ਗੈਸ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਹਾਲ ਹੀ ਵਿੱਚ ਕਿਹਾ ਸੀ ਕਿ ਭਾਰਤ ਦੀ 1.4 ਬਿਲੀਅਨ ਦੀ ਆਬਾਦੀ ਊਰਜਾ ਦੀ ਮੰਗ ਦਾ ਮੁੱਖ ਕਾਰਕ ਹੈ। ਭਾਰਤ ਦੁਨੀਆ ਵਿੱਚ ਤੇਲ ਦੇ ਸਭ ਤੋਂ ਵੱਡੇ ਖਪਤਕਾਰਾਂ ਵਿੱਚੋਂ ਇੱਕ ਹੈ। ਭਵਿੱਖ ਦੀਆਂ ਊਰਜਾ ਲੋੜਾਂ ਨੂੰ ਪੂਰਾ ਕਰਨ ਲਈ ਵੱਡੇ ਪੱਧਰ ‘ਤੇ ਕੰਮ ਚੱਲ ਰਿਹਾ ਹੈ। ਕਿਸੇ ਵੀ ਦੇਸ਼ ਦੇ ਵਿਕਾਸ ਲਈ ਊਰਜਾ ਦੀ ਖਪਤ ਜ਼ਰੂਰੀ ਹੈ। ਇਸ ਸਮੇਂ ਦੇਸ਼ ਵਿੱਚ 455 ਕਰੋੜ ਲੀਟਰ ਈਥਾਨੌਲ ਦਾ ਉਤਪਾਦਨ ਹੋ ਰਿਹਾ ਹੈ, ਜਿਸ ਨੂੰ 1,000 ਕਰੋੜ ਲੀਟਰ ਤੱਕ ਪਹੁੰਚਣ ਦਾ ਟੀਚਾ ਹੈ। ਬ੍ਰਾਜ਼ੀਲ ‘ਚ ਵੱਡੇ ਪੱਧਰ ‘ਤੇ ਪੈਟਰੋਲ ਨਾਲ ਈਥਾਨੌਲ ਦੀ ਮਿਲਾਵਟ ਹੋ ਰਹੀ ਹੈ।
