ਫੈਕਟ ਸਮਾਚਾਰ ਸੇਵਾ
ਫਰਵਰੀ 1
ਮੇਥੀਦਾਣੇ ਵਾਲਾਂ ਦੇ ਇਨਫੈਕਸ਼ਨ ਅਤੇ ਐਲਰਜੀ ਨੂੰ ਰੋਕਣ ਲਈ ਫਾਇਦੇਮੰਦ ਹੁੰਦੇ ਹਨ। ਇਹ ਵਾਲਾਂ ਨਾਲ ਜੁੜੀਆਂ ਹੋਰ ਵੀ ਕਈ ਸਮੱਸਿਆਵਾਂ ਨੂੰ ਦੂਰ ਕਰਦਾ ਹੈ। ਇੱਕ ਅਧਿਐਨ ਨੇ ਸਾਬਤ ਕੀਤਾ ਹੈ ਕਿ ਮੇਥੀਦਾਣੇ ਦਾ ਨਿਯਮਤ ਸੇਵਨ ਵਾਲਾਂ ਦੇ ਝੜਨ, ਕਮਜ਼ੋਰ ਵਾਲਾਂ ਅਤੇ ਡੈਂਡਰਫ ਦੀ ਸਮੱਸਿਆ ਨੂੰ ਦੂਰ ਕਰਨ ਵਿੱਚ ਕਾਰਗਰ ਹੈ। ਮੇਥੀਦਾਣਾ ਤੁਹਾਡੇ ਵਾਲਾਂ ਦੀਆਂ ਜੜ੍ਹਾਂ ਨੂੰ ਮਜ਼ਬੂਤ ਬਣਾ ਕੇ ਨਵੇਂ ਵਾਲ ਉਗਾਉਣ ਵਿੱਚ ਮਦਦਗਾਰ ਹੁੰਦੇ ਹਨ। ਇਹ ਵਾਲਾਂ ਦੀ ਚਮਕ ਵਧਾ ਕੇ ਵਾਲਾਂ ਨੂੰ ਰੇਸ਼ਮੀ ਬਣਾਉਣ ਵਿੱਚ ਮਦਦ ਕਰਦਾ ਹੈ। ਆਓ ਜਾਣਦੇ ਹਾਂ ਵਾਲਾਂ ਨੂੰ ਮਜ਼ਬੂਤ ਅਤੇ ਰੇਸ਼ਮੀ ਬਣਾਉਣ ਲਈ ਮੇਥੀਦਾਣੇ ਦੀ ਵਰਤੋਂ ਕਿਵੇਂ ਕੀਤੀ ਜਾ ਸਕਦੀ ਹੈ :
ਮੇਥੀਦਾਣਾ ਹੇਅਰ ਸਪਰੇਅ
100 ਗ੍ਰਾਮ ਮੇਥੀਦਾਣੇ ਨੂੰ ਇੱਕ ਕੱਪ ਪਾਣੀ ਵਿੱਚ ਰਾਤ ਭਰ ਭਿਓ ਦਿਓ। ਸਵੇਰੇ ਇਸ ਪਾਣੀ ਨੂੰ ਛਾਣੋ ਅਤੇ ਇੱਕ ਸਪ੍ਰੇਅ ਬੋਤਲ ਵਿੱਚ ਰੱਖੋ। ਇਸ ਪਾਣੀ ਨੂੰ ਵਾਲਾਂ ‘ਤੇ ਲਗਾਓ। ਇਸ ਨੂੰ ਚਾਰ ਤੋਂ ਪੰਜ ਘੰਟੇ ਲਈ ਛੱਡ ਦਿਓ ਅਤੇ ਫਿਰ ਸਾਫ਼ ਪਾਣੀ ਨਾਲ ਵਾਲ ਧੋ ਲਓ। ਇਹ ਤੁਹਾਡੇ ਵਾਲਾਂ ਦੀ ਚਮਕ ਵਧਾਉਣ ਦੇ ਨਾਲ-ਨਾਲ ਵਾਲਾਂ ਦੀ ਗ੍ਰੋਥ ਵੀ ਵਧਾਏਗਾ।
ਡਾਈਟ ‘ਚ ਮੇਥੀਦਾਣੇ ਦਾ ਸੇਵਨ
ਰੋਜ਼ਾਨਾ 50 ਗ੍ਰਾਮ ਮੇਥੀਦਾਣੇ ਨੂੰ ਖਾਣ ਨਾਲ ਵਾਲਾਂ ਦੀਆਂ ਸਾਰੀਆਂ ਸਮੱਸਿਆਵਾਂ ਤੋਂ ਛੁਟਕਾਰਾ ਮਿਲ ਸਕਦਾ ਹੈ। ਮੇਥੀਦਾਣੇ ਨੂੰ ਸਲਾਦ ਦੇ ਰੂਪ ਵਿੱਚ, ਮਸਾਲੇ ਦੇ ਰੂਪ ਵਿੱਚ ਅਤੇ ਪਾਊਡਰ ਦੇ ਰੂਪ ਵਿੱਚ ਲਿਆ ਜਾ ਸਕਦਾ ਹੈ। ਮੇਥੀ ਨੂੰ ਰਾਤ ਭਰ ਭਿਓਂ ਕੇ ਰੱਖੋ ਅਤੇ ਸਵੇਰੇ ਮੇਥੀ ਦੇ ਦਾਣੇ ਚਬਾ ਕੇ ਖਾਓ ਅਤੇ ਇਸ ਦਾ ਪਾਣੀ ਪੀਓ।
ਵਾਲਾਂ ਦੇ ਝੜਨ ਲਈ ਮੇਥੀਦਾਣਾ ਹੇਅਰ ਪੈਕ
100 ਗ੍ਰਾਮ ਮੇਥੀਦਾਣੇ ਨੂੰ ਇੱਕ ਕਟੋਰੀ ਪਾਣੀ ਵਿੱਚ ਰਾਤ ਭਰ ਭਿਓ ਦਿਓ। ਇਸ ‘ਚ ਕੜੀ ਪੱਤੇ ਨੂੰ ਮਿਲਾ ਕੇ ਸਵੇਰੇ ਉਬਾਲ ਲਓ। ਹੁਣ ਇਸ ਨੂੰ ਪੀਸ ਕੇ ਪੇਸਟ ਬਣਾ ਲਓ, ਇਸ ਪੇਸਟ ਨੂੰ ਸਿਰ ਦੇ ਸਕੈਲਪ ਅਤੇ ਵਾਲਾਂ ‘ਤੇ ਲਗਾਓ। ਇਸ ਨੂੰ ਇਕ ਘੰਟੇ ਲਈ ਛੱਡ ਦਿਓ ਅਤੇ ਫਿਰ ਸ਼ੈਂਪੂ ਕਰੋ। ਇਸ ਹੇਅਰ ਪੈਕ ਨੂੰ ਹਫਤੇ ‘ਚ ਇਕ ਵਾਰ ਲਗਾਓ। ਇਹ ਵਾਲਾਂ ਦੇ ਝੜਨ ‘ਚ ਫਾਇਦੇਮੰਦ ਹੁੰਦਾ ਹੈ।
ਵਾਲਾਂ ਦੇ ਵਾਧੇ ਅਤੇ ਚਮਕ ਲਈ ਮੇਥੀਦਾਣਾ ਹੇਅਰ ਮਾਸਕ
50 ਗ੍ਰਾਮ ਮੇਥੀਦਾਣੇ ਨੂੰ ਰਾਤ ਭਰ ਪਾਣੀ ਵਿੱਚ ਭਿਓ ਦਿਓ। ਸਵੇਰੇ ਇਸ ਨੂੰ ਪੀਸ ਕੇ ਪੇਸਟ ਬਣਾ ਲਓ। ਹੁਣ ਇਸ ‘ਚ ਇਕ ਚੱਮਚ ਨਾਰੀਅਲ ਦਾ ਦੁੱਧ ਮਿਲਾਓ। ਇਸ ਮਾਸਕ ਨੂੰ ਸਕੈਲਪ ‘ਤੇ ਲਗਾਓ ਅਤੇ ਮਸਾਜ ਕਰੋ। 10 ਮਿੰਟ ਤੱਕ ਮਾਲਿਸ਼ ਕਰਨ ਤੋਂ ਬਾਅਦ ਇਸ ਨੂੰ ਸਿਰ ਦੇ ਸਕੈਲਪ ‘ਤੇ 20 ਮਿੰਟ ਲਈ ਛੱਡ ਦਿਓ। ਫਿਰ ਸ਼ੈਂਪੂ ਕਰੋ, ਇਸ ਪੈਕ ਨੂੰ ਹਫ਼ਤੇ ਵਿਚ ਇਕ ਜਾਂ ਦੋ ਵਾਰ ਲਗਾਇਆ ਜਾ ਸਕਦਾ ਹੈ।
ਮੇਥੀ ਵਾਲਾਂ ਲਈ ਕਿਵੇਂ ਹੈ ਫਾਇਦੇਮੰਦ
- ਮੇਥੀ ਵਿੱਚ ਪ੍ਰੋਟੀਨ, ਨਿਕੋਟਿਨਿਕ ਐਸਿਡ ਪਾਇਆ ਜਾਂਦਾ ਹੈ ਜੋ ਵਾਲਾਂ ਨੂੰ ਪੋਸ਼ਣ ਦਿੰਦਾ ਹੈ।
- ਮੇਥੀ ਵਿੱਚ ਲੇਸੀਥਿਨ ਨਾਮਕ ਫੈਟ ਹੁੰਦਾ ਹੈ ਜੋ ਵਾਲਾਂ ਨੂੰ ਮਜ਼ਬੂਤ ਬਣਾਉਂਦਾ ਹੈ।
- ਮੇਥੀ ਵਿੱਚ ਐਂਟੀ-ਫੰਗਲ ਗੁਣ ਹੁੰਦੇ ਹਨ ਜੋ ਡੈਂਡਰਫ ਤੋਂ ਬਚਾਉਂਦੇ ਹਨ ਜੋ ਵਾਲਾਂ ਦੇ ਝੜਨ ਦਾ ਕਾਰਨ ਹੈ।
- ਮੇਥੀ ਵਿੱਚ ਇਮੋਲੈਂਟ ਪਾਇਆ ਜਾਂਦਾ ਹੈ ਜੋ ਸਕੈਲਪ ਦੀ ਚਮੜੀ ਨੂੰ ਨਮੀ ਦਿੰਦਾ ਹੈ ਅਤੇ ਇਸਨੂੰ ਸਿਹਤਮੰਦ ਰੱਖਦਾ ਹੈ।
- ਮੇਥੀ ਵਿੱਚ ਵਿਟਾਮਿਨ ਸੀ, ਵਿਟਾਮਿਨ ਕੇ, ਫੋਲਿਕ ਐਸਿਡ, ਆਇਰਨ ਅਤੇ ਪੋਟਾਸ਼ੀਅਮ ਵਰਗੇ ਜ਼ਰੂਰੀ ਤੱਤ ਪਾਏ ਜਾਂਦੇ ਹਨ ਜੋ ਵਾਲਾਂ ਨੂੰ ਸਿਹਤਮੰਦ ਰੱਖਦੇ ਹਨ।
