ਅੱਜ-ਕੱਲ੍ਹ ChatGPT, Google Gemini ਅਤੇ Grok ਵਰਗੇ AI ਚੈਟਬੌਟਸ ਦੀ ਵਰਤੋਂ ਬਹੁਤ ਤੇਜ਼ੀ ਨਾਲ ਵਧ ਰਹੀ ਹੈ। ਲੋਕ ਨਾ ਸਿਰਫ਼ ਆਮ ਸਵਾਲਾਂ ਲਈ, ਸਗੋਂ ਆਪਣੀ ਸਿਹਤ, ਬਿਮਾਰੀਆਂ ਅਤੇ ਨਿੱਜੀ ਸਮੱਸਿਆਵਾਂ ਦੇ ਹੱਲ ਲਈ ਵੀ ਇਨ੍ਹਾਂ ਟੂਲਸ ਦਾ ਸਹਾਰਾ ਲੈ ਰਹੇ ਹਨ। ਓਪਨਏਆਈ (OpenAI) ਦੀ ਇੱਕ ਤਾਜ਼ਾ ਰਿਪੋਰਟ ਅਨੁਸਾਰ ਹਰ ਹਫ਼ਤੇ ਲਗਭਗ 23 ਕਰੋੜ ਲੋਕ ਚੈਟਜੀਪੀਟੀ ਤੋਂ ਸਿਹਤ ਅਤੇ ਵੈਲਨੇਸ ਨਾਲ ਸਬੰਧਤ ਸਵਾਲ ਪੁੱਛਦੇ ਹਨ। ਬਹੁਤ ਸਾਰੇ ਯੂਜ਼ਰਸ ਆਪਣੀ ਮੈਡੀਕਲ ਹਿਸਟਰੀ, ਬੀਮਾ ਜਾਣਕਾਰੀ, ਦਵਾਈਆਂ ਦੇ ਵੇਰਵੇ ਅਤੇ ਜਾਂਚ ਰਿਪੋਰਟਾਂ ਵੀ ਇਨ੍ਹਾਂ ਪਲੇਟਫਾਰਮਾਂ ‘ਤੇ ਸਾਂਝੀਆਂ ਕਰ ਰਹੇ ਹਨ, ਜੋ ਕਿ ਭਵਿੱਖ ਵਿੱਚ ਗੰਭੀਰ ਨੁਕਸਾਨ ਦਾ ਕਾਰਨ ਬਣ ਸਕਦਾ ਹੈ।
ਹਾਲਾਂਕਿ OpenAI ਵਰਗੀਆਂ ਕੰਪਨੀਆਂ ਨੇ ‘ਚੈਟਜੀਪੀਟੀ ਹੈਲਥ’ ਵਰਗੇ ਪਲੇਟਫਾਰਮ ਪੇਸ਼ ਕੀਤੇ ਹਨ ਅਤੇ ਦਾਅਵਾ ਕੀਤਾ ਹੈ ਕਿ ਯੂਜ਼ਰਸ ਦਾ ਡੇਟਾ ਪੂਰੀ ਤਰ੍ਹਾਂ ਗੁਪਤ ਰੱਖਿਆ ਜਾਂਦਾ ਹੈ, ਪਰ ਸਿਹਤ ਅਤੇ ਡੇਟਾ ਪ੍ਰਾਈਵੇਸੀ ਮਾਹਿਰਾਂ ਨੇ ਇਸ ‘ਤੇ ਗੰਭੀਰ ਚਿੰਤਾ ਪ੍ਰਗਟਾਈ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਭਾਵੇਂ ਕੰਪਨੀਆਂ ਹੁਣ ਡੇਟਾ ਸੁਰੱਖਿਅਤ ਹੋਣ ਦਾ ਦਾਅਵਾ ਕਰ ਰਹੀਆਂ ਹਨ, ਪਰ ਭਵਿੱਖ ਵਿੱਚ ਨੀਤੀਆਂ ਬਦਲਣ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ। ਜੇਕਰ ਇਹ ਸੰਵੇਦਨਸ਼ੀਲ ਡਾਕਟਰੀ ਜਾਣਕਾਰੀ ਗਲਤ ਹੱਥਾਂ ਵਿੱਚ ਚਲੀ ਜਾਂਦੀ ਹੈ, ਤਾਂ ਇਸ ਦੀ ਦੁਰਵਰਤੋਂ ਇੰਸ਼ੋਰੈਂਸ ਕਲੇਮ ਰੱਦ ਕਰਨ, ਨੌਕਰੀ ਦੇ ਮੌਕੇ ਪ੍ਰਭਾਵਿਤ ਕਰਨ ਜਾਂ ਵਿੱਤੀ ਧੋਖਾਧੜੀ ਲਈ ਕੀਤੀ ਜਾ ਸਕਦੀ ਹੈ।
ਇਸ ਲਈ ਇਹ ਬਹੁਤ ਜ਼ਰੂਰੀ ਹੈ ਕਿ AI ਚੈਟਬੌਟਸ ਦੀ ਵਰਤੋਂ ਕਰਦੇ ਸਮੇਂ ਕੁਝ ਖਾਸ ਸਾਵਧਾਨੀਆਂ ਵਰਤੀਆਂ ਜਾਣ। ਲੋਕਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਆਪਣੀ ਅਸਲ ਪਛਾਣ, ਡਾਕਟਰੀ ਰਿਪੋਰਟਾਂ ਅਤੇ ਨਿੱਜੀ ਹੈਲਥ ਡੇਟਾ ਨੂੰ ਇਨ੍ਹਾਂ ਟੂਲਸ ਨਾਲ ਸਾਂਝਾ ਕਰਨ ਤੋਂ ਬਚਣ। ਏਆਈ ਨੂੰ ਸਿਰਫ਼ ਇੱਕ ਸਹਾਇਕ ਸਾਧਨ ਵਜੋਂ ਦੇਖਿਆ ਜਾਣਾ ਚਾਹੀਦਾ ਹੈ ਅਤੇ ਇਸ ਨੂੰ ਕਿਸੇ ਪੇਸ਼ੇਵਰ ਡਾਕਟਰ ਜਾਂ ਮਾਹਿਰ ਦੀ ਸਲਾਹ ਦਾ ਵਿਕਲਪ ਨਹੀਂ ਮੰਨਣਾ ਚਾਹੀਦਾ, ਕਿਉਂਕਿ ਇੱਕ ਛੋਟੀ ਜਿਹੀ ਲਾਪਰਵਾਈ ਜਾਨਲੇਵਾ ਵੀ ਸਾਬਤ ਹੋ ਸਕਦੀ ਹੈ।
