ਫੈਕਟ ਸਮਾਚਾਰ ਸੇਵਾ
ਬੀਜਿੰਗ , ਸਤੰਬਰ 18
ਚੀਨ ਵਿੱਚ ਇੱਕ 55 ਸਾਲਾ ਫੂਡ ਡਿਲੀਵਰੀ ਕਰਨ ਵਾਲੇ ਵਿਅਕਤੀ ਦੀ 18 ਘੰਟੇ ਕੰਮ ਕਰਨ ਤੋਂ ਬਾਅਦ ਆਪਣੀ ਬਾਈਕ ਉੱਤੇ ਝਪਕੀ ਲੈਂਦੇ ਸਮੇਂ ਮੌਤ ਹੋ ਗਈ। ਇਹ ਘਟਨਾ ਇਸ ਮਹੀਨੇ ਦੀ ਸ਼ੁਰੂਆਤ ‘ਚ ਦੱਖਣੀ ਚੀਨ ਦੇ ਝੇਜਿਆਂਗ ਸੂਬੇ ਦੇ ਹਾਂਗਝੂ ‘ਚ ਵਾਪਰੀ। ਇਸ ਘਟਨਾ ਦੀ ਵੀਡੀਓ ਚੀਨੀ ਸੋਸ਼ਲ ਮੀਡੀਆ ਸਾਈਟਾਂ ‘ਤੇ ਵਾਇਰਲ ਹੋ ਰਹੀ ਹੈ, ਜਿਸ ਤੋਂ ਬਾਅਦ ਡਿਲੀਵਰੀ ਏਜੰਟਾਂ ਦੀ ਭਲਾਈ ਅਤੇ ਕਾਨੂੰਨੀ ਅਧਿਕਾਰਾਂ ਨੂੰ ਲੈ ਕੇ ਦੇਸ਼ ਭਰ ਵਿਚ ਚਰਚਾ ਸ਼ੁਰੂ ਹੋ ਗਈ ਹੈ। ਇੱਕ ਗਵਾਹ ਨੇ ਦੱਸਿਆ ਕਿ ਫੂਡ ਡਿਲੀਵਰੀ ਕਰਨ ਵਾਲਾ ਵਿਅਕਤੀ ਰਾਤ 9 ਵਜੇ ਤੋਂ ਅਗਲੇ ਦਿਨ 1 ਵਜੇ ਤੱਕ ਆਪਣੇ ਵਾਹਨ ‘ਤੇ ਪਿਆ ਰਿਹਾ। ਇਕ ਹੋਰ ਡਿਲੀਵਰੀ ਏਜੰਟ ਨੇ ਉਸ ਨੂੰ ਦੇਖਿਆ। ਮ੍ਰਿਤਕ ਦੀ ਪਛਾਣ ਯੁਆਨ ਵਜੋਂ ਹੋਈ ਹੈ। ਉਹ ਆਪਣੇ ਕੰਮ ਲਈ ਮਸ਼ਹੂਰ ਸੀ, ਲੋਕ ਉਸਨੂੰ ਆਰਡਰ ਕਿੰਗ ਵਜੋਂ ਜਾਣਦੇ ਸਨ। ਯੁਆਨ ਰੋਜ਼ਾਨਾ 500 ਤੋਂ 600 ਯੂਆਨ (5000-7000 ਰੁਪਏ) ਕਮਾਉਂਦੇ ਸਨ। ਉਹ ਬਰਸਾਤ ਦੇ ਮੌਸਮ ਦੌਰਾਨ 700 ਯੂਆਨ ਕਮਾਉਂਦਾ ਸੀ।
ਇਕ ਵਿਅਕਤੀ ਨੇ ਦੱਸਿਆ ਕਿ ਆਰਡਰ ਕਿੰਗ ਕਈ ਵਾਰ ਸਵੇਰੇ 3 ਵਜੇ ਤੱਕ ਕੰਮ ਕਰਦਾ ਸੀ ਅਤੇ ਸਵੇਰੇ 6 ਵਜੇ ਉੱਠ ਕੇ ਦੁਬਾਰਾ ਕੰਮ ਕਰਨਾ ਸ਼ੁਰੂ ਕਰ ਦਿੰਦਾ ਸੀ। ਜਦੋਂ ਉਹ ਥਕਾਵਟ ਮਹਿਸੂਸ ਕਰਦਾ, ਤਾਂ ਉਹ ਆਪਣੀ ਬਾਈਕ ‘ਤੇ ਥੋੜ੍ਹੀ ਜਿਹੀ ਝਪਕੀ ਲੈ ਲੈਂਦਾ ਸੀ। ਇਸ ਤੋਂ ਬਾਅਦ ਉਹ ਆਪਣੇ ਕੰਮ ‘ਤੇ ਵਾਪਸ ਆ ਜਾਂਦਾ ਸੀ। ਯੂਆਨ ਦੇ ਇੱਕ ਸਹਿ-ਕਰਮਚਾਰੀ ਨੇ ਦੱਸਿਆ ਕਿ 55 ਸਾਲਾ ਆਰਡਰ ਕਿੰਗ ਦੀ ਮੌਤ ਤੋਂ ਇੱਕ ਮਹੀਨਾ ਪਹਿਲਾਂ ਇੱਕ ਹਾਦਸੇ ਵਿੱਚ ਲੱਤ ਟੁੱਟ ਗਈ ਸੀ। 10 ਦਿਨ ਆਰਾਮ ਕਰਨ ਤੋਂ ਬਾਅਦ, ਉਹ ਆਪਣੇ ਕੰਮ ‘ਤੇ ਵਾਪਸ ਆ ਗਿਆ ਅਤੇ ਦੋ ਹਫ਼ਤਿਆਂ ਬਾਅਦ ਹੀ ਉਸਦੀ ਮੌਤ ਹੋ ਗਈ।