ਫੈਕਟ ਸਮਾਚਾਰ ਸੇਵਾ
ਰੋਹਤਕ , ਜਨਵਰੀ 28
ਯਮੁਨਾ ਦੇ ਮੁੱਦੇ ‘ਤੇ ਦਿੱਲੀ ਅਤੇ ਹਰਿਆਣਾ ਸਰਕਾਰਾਂ ਇਕ ਵਾਰ ਫਿਰ ਆਹਮੋ-ਸਾਹਮਣੇ ਆ ਗਈਆਂ ਹਨ। ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਹਰਿਆਣਾ ਦੀ ਭਾਜਪਾ ਸਰਕਾਰ ‘ਤੇ ਯਮੁਨਾ ‘ਚ ਜ਼ਹਿਰ ਘੋਲਣ ਦਾ ਦੋਸ਼ ਲਗਾਇਆ ਹੈ। ਪਾਰਟੀ ਦਾ ਕਹਿਣਾ ਹੈ ਕਿ ਹਰਿਆਣਾ ਤੋਂ ਆਉਣ ਵਾਲੇ ਪਾਣੀ ਵਿੱਚ ਅਮੋਨੀਆ ਦੀ ਮਾਤਰਾ ਬਹੁਤ ਜ਼ਿਆਦਾ ਹੋਣ ਕਾਰਨ ਦਿੱਲੀ ਦੇ ਤਿੰਨ ਵਾਟਰ ਸਪਲਾਈ ਪਲਾਂਟ ਬੰਦ ਹੋਣ ਦੀ ਕਗਾਰ ‘ਤੇ ਹਨ ਅਤੇ ਰਾਸ਼ਟਰੀ ਰਾਜਧਾਨੀ ਵਿੱਚ ਪਾਣੀ ਦਾ ਸੰਕਟ ਸ਼ੁਰੂ ਹੋ ਗਿਆ ਹੈ। ਕਮਿਸ਼ਨ ਨੇ ਹਰਿਆਣਾ ਸਰਕਾਰ ਨੂੰ ਅੱਜ ਦੁਪਹਿਰ 12 ਵਜੇ ਤੱਕ ਇਸ ਮਾਮਲੇ ‘ਤੇ ਤੱਥਾਂ ਵਾਲੀ ਰਿਪੋਰਟ ਦੇਣ ਲਈ ਕਿਹਾ ਹੈ। ਇਸ ਦੇ ਨਾਲ ਹੀ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਅਤੇ ਹਰਿਆਣਾ ਭਾਜਪਾ ਨੇ ਕੇਜਰੀਵਾਲ ਦੇ ਦੋਸ਼ਾਂ ‘ਤੇ ਪਲਟਵਾਰ ਕੀਤਾ ਹੈ।
ਉੱਥੇ ਹੀ ਹਰਿਆਣਾ ਸਰਕਾਰ ਦੇ ਮੰਤਰੀਆਂ ਅਤੇ ਵਿਧਾਇਕਾਂ ਨੇ ਅੱਜ ਪੰਚਕੂਲਾ ਦੇ ਬੇਲਾਵਿਸਟਾ ਚੌਕ ਵਿੱਚ ਪ੍ਰਦਰਸ਼ਨ ਕੀਤਾ ਤੇ ਕੇਜਰੀਵਾਲ ਦਾ ਪੁਤਲਾ ਫੂਕਿਆ।
ਵਿਜ ਨੇ ਕਿਹਾ- ਦਿੱਲੀ ਦੀ ਜਨਤਾ ਕੇਜਰੀਵਾਲ ਨੂੰ ਸਜ਼ਾ ਦੇਵੇਗੀ
ਕੇਜਰੀਵਾਲ ਦੇ ਇਲਜ਼ਾਮਾਂ ‘ਤੇ ਸੀਐਮ ਨਾਇਬ ਸਿੰਘ ਸੈਣੀ ਨੇ ਕਿਹਾ ਕਿ ਦਿੱਲੀ ਜਲ ਬੋਰਡ ਦੇ ਇੰਜਨੀਅਰਾਂ ਨੇ ਪਾਣੀ ਨੂੰ ਦਿੱਲੀ ਆਉਣ ਤੋਂ ਰੋਕ ਦਿੱਤਾ ਜਦੋਂ ਉਨ੍ਹਾਂ ਨੂੰ ਪਤਾ ਲੱਗਿਆ ਕਿ ਇਸ ਵਿੱਚ ਜ਼ਹਿਰ ਹੈ। ਇੰਜਨੀਅਰਾਂ ਨੇ ਇਹ ਸਿੱਟਾ ਕਿਵੇਂ ਕੱਢਿਆ ਕਿ ਇਸ ਵਿਚ ਜ਼ਹਿਰ ਹੈ? ਕੇਜਰੀਵਾਲ ਦੱਸਣ ਕਿ ਕਿਹੜਾ ਜ਼ਹਿਰ ਪਾਇਆ ਗਿਆ, ਕਿੰਨੇ ਟਨ ਜ਼ਹਿਰ ਡੋਲ੍ਹਿਆ ਗਿਆ। ਫਿਰ ਸਰਹੱਦ ‘ਤੇ ਪਾਣੀ ਕਿਵੇਂ ਰੋਕਿਆ ਗਿਆ, ਕੀ ਕੋਈ ਕੰਧ ਬਣਾਈ ਗਈ, ਕਿੱਥੇ ਬਣਾਈ ਗਈ? ਜੇ ਪਾਣੀ ਜ਼ਹਿਰੀਲਾ ਸੀ ਤਾਂ ਉਸ ਜ਼ਹਿਰੀਲੇ ਪਾਣੀ ਨਾਲ ਕਿੰਨੀਆਂ ਮੱਛੀਆਂ ਮਰੀਆਂ। ਸਸਤੀ ਅਤੇ ਝੂਠੀ ਰਾਜਨੀਤੀ ਕਰਨ ਵਿੱਚ ਕੇਜਰੀਵਾਲ ਦੀ ਕੋਈ ਬਰਾਬਰੀ ਨਹੀਂ ਹੈ।
ਸੈਣੀ ਨੇ ਕਿਹਾ ਕਿ ਕੇਜਰੀਵਾਲ ਨੇ ਉਸ ਮਿੱਟੀ ਦਾ ਅਪਮਾਨ ਕੀਤਾ ਜਿੱਥੇ ਉਹ ਪੈਦਾ ਹੋਇਆ ਹੈ। ਹਰਿਆਣਾ ਦੇ ਲੋਕ ਯਮੁਨਾ ਨੂੰ ਪਵਿੱਤਰ ਨਦੀ ਮੰਨਦੇ ਹਨ ਅਤੇ ਇਸ ਦੀ ਪੂਜਾ ਕਰਦੇ ਹਨ। ਹਰਿਆਣਾ ਦੇ ਲੋਕ ਨਦੀ ਦੇ ਪਾਣੀ ਵਿੱਚ ਜ਼ਹਿਰ ਕਿਉਂ ਮਿਲਾਉਣਗੇ? ਅਰਵਿੰਦ ਕੇਜਰੀਵਾਲ ਨੇ ਸਾਲ 2020 ਵਿੱਚ ਝੂਠਾ ਵਾਅਦਾ ਕੀਤਾ ਸੀ ਕਿ ਜੇਕਰ ਯਮੁਨਾ ਨੂੰ ਪ੍ਰਦੂਸ਼ਣ ਤੋਂ ਨਾ ਬਚਾਇਆ ਗਿਆ ਤਾਂ ਉਹ ਕਦੇ ਵੀ ਵੋਟਾਂ ਨਹੀਂ ਮੰਗਣਗੇ। ਚੋਣਾਂ ਵਿੱਚ ਸੰਭਾਵਿਤ ਹਾਰ ਨੂੰ ਦੇਖਦਿਆਂ ਕੇਜਰੀਵਾਲ ਆਪਣਾ ਮਾਨਸਿਕ ਸੰਤੁਲਨ ਗੁਆ ਬੈਠਾ ਹੈ। ਕੇਜਰੀਵਾਲ ਨੂੰ ਹਰਿਆਣਾ ਅਤੇ ਦਿੱਲੀ ਦੇ ਲੋਕਾਂ ਤੋਂ ਤੁਰੰਤ ਮੁਆਫੀ ਮੰਗਣੀ ਚਾਹੀਦੀ ਹੈ , ਨਹੀਂ ਤਾਂ ਅਸੀਂ ਉਨ੍ਹਾਂ ਖਿਲਾਫ ਮਾਣਹਾਨੀ ਦਾ ਦਾਅਵਾ ਠੋਕਵਾਂਗੇ।
