ਫੈਕਟ ਸਮਾਚਾਰ ਸੇਵਾ
ਰੋਹਤਕ , ਨਵੰਬਰ 26
ਪਿੰਡ ਲਾਖਨਮਾਜਰਾ ਵਿੱਚ ਗਰਾਊਂਡ ਵਿੱਚ ਅਭਿਆਸ ਕਰਦੇ ਸਮੇਂ ਖੰਭਾ ਟੁੱਟ ਕੇ ਡਿੱਗਣ ਕਾਰਨ 17 ਸਾਲਾ ਨੈਸ਼ਨਲ ਬਾਸਕਟਬਾਲ ਖਿਡਾਰੀ ਹਾਰਦਿਕ ਰਾਠੀ ਦੀ ਮੌਤ ਹੋ ਗਈ। ਹਾਰਦਿਕ ਰਾਠੀ ਤਿੰਨ ਸਬ-ਜੂਨੀਅਰ ਨੈਸ਼ਨਲ ਅਤੇ ਇੱਕ ਯੂਥ ਨੈਸ਼ਨਲ ਵਿੱਚ ਖੇਡ ਚੁੱਕਾ ਸੀ। ਉਹ ਬਾਸਕਟਬਾਲ ਫੈਡਰੇਸ਼ਨ ਆਫ਼ ਇੰਡੀਆ ਦੀ ਇੰਦੌਰ ਅਕੈਡਮੀ ਵਿੱਚ ਵੀ ਚੁਣਿਆ ਗਿਆ ਸੀ।
ਅਭਿਆਸ ਲਈ ਅਕੈਡਮੀ ਵੱਲੋਂ ਫੋਨ ਕਰਕੇ ਬੁਲਾਇਆ ਜਾਂਦਾ ਸੀ। ਇਸ ਲਈ ਹਾਰਦਿਕ ਹੁਣ ਪਿੰਡ ਵਿੱਚ ਹੀ ਅਭਿਆਸ ਕਰਦਾ ਸੀ। ਲਗਪਗ ਸਾਢੇ ਦਸ ਵਜੇ ਹਾਰਦਿਕ ਅਕੈਡਮੀ ਵਿੱਚ ਅਭਿਆਸ ਕਰ ਰਿਹਾ ਸੀ। ਉਸ ਸਮੇਂ ਟੀਮ ਦੇ ਹੋਰ ਮੈਂਬਰ ਇੱਕ ਪਾਸੇ ਆਰਾਮ ਕਰ ਰਹੇ ਸਨ।
ਉਸੇ ਦੌਰਾਨ ਜੰਪ ਕਰਦੇ ਸਮੇਂ ਬਾਸਕਟਬਾਲ ਦਾ ਖੰਭਾ ਹਾਰਦਿਕ ਉੱਤੇ ਡਿੱਗ ਗਿਆ। ਨੇੜੇ ਹੀ ਬੈਠੇ ਖਿਡਾਰੀਆਂ ਨੇ ਕੁਝ ਹੀ ਸਕਿੰਟਾਂ ਵਿੱਚ ਹਾਰਦਿਕ ਨੂੰ ਖੰਭੇ ਦੇ ਹੇਠਾਂ ਤੋਂ ਕੱਢਿਆ ਅਤੇ ਇਲਾਜ ਲਈ ਹਸਪਤਾਲ ਪਹੁੰਚਾਇਆ, ਜਿੱਥੇ ਡਾਕਟਰਾਂ ਨੇ ਉਸਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ।
ਮਾਮਲੇ ਬਾਰੇ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ। ਸੂਚਨਾ ਮਿਲਣ ਤੋਂ ਬਾਅਦ ਥਾਣਾ ਲਾਖਨ ਮਾਜਰਾ ਪੁਲਿਸ ਮੌਕੇ ‘ਤੇ ਪਹੁੰਚੀ। ਪੁਲਿਸ ਨੇ ਪਰਿਵਾਰਕ ਮੈਂਬਰਾਂ ਦੇ ਬਿਆਨਾਂ ‘ਤੇ ਇਤਫ਼ਾਕੀਆ ਕਾਰਵਾਈ ਕਰਦੇ ਹੋਏ, ਪੋਸਟਮਾਰਟਮ ਤੋਂ ਬਾਅਦ ਲਾਸ਼ ਪਰਿਵਾਰ ਦੇ ਹਵਾਲੇ ਕਰ ਦਿੱਤੀ ਹੈ। ਪੁਲਿਸ ਅਨੁਸਾਰ ਪਿੰਡ ਲਾਖਨਮਾਜਰਾ ਨਿਵਾਸੀ ਸੰਦੀਪ ਦੇ ਦੋ ਪੁੱਤਰ ਹਨ। ਵੱਡਾ ਪੁੱਤਰ 16 ਸਾਲਾ ਹਾਰਦਿਕ ਬਾਸਕਟਬਾਲ ਦਾ ਨੈਸ਼ਨਲ ਖਿਡਾਰੀ ਸੀ। ਹਾਰਦਿਕ ਦੀ ਮੌਤ ਦਾ ਪੂਰਾ ਘਟਨਾਕ੍ਰਮ ਗਰਾਊਂਡ ਵਿੱਚ ਲੱਗੇ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਿਆ।
ਸੀਸੀਟੀਵੀ ਫੁਟੇਜ ਦੇ ਅਨੁਸਾਰ ਹਾਰਦਿਕ ਗਰਾਊਂਡ ‘ਤੇ ਅਭਿਆਸ ਕਰ ਰਿਹਾ ਸੀ। ਉੱਪਰ ਛਾਲ ਮਾਰਦੇ ਸਮੇਂ ਅਚਾਨਕ ਖੰਭਾ ਉਸ ਉੱਪਰ ਡਿੱਗ ਗਿਆ। ਇਸ ਘਟਨਾ ਤੋਂ ਬਾਅਦ ਪਿੰਡ ਅਤੇ ਖੇਡ ਜਗਤ ਦੇ ਲੋਕਾਂ ਵਿੱਚ ਮਾਤਮ ਛਾਇਆ ਹੋਇਆ ਹੈ।
ਖਿਡਾਰੀ ਦੀ ਮੌਤ ਤੋਂ ਬਾਅਦ ਹਰਿਆਣਾ ਓਲੰਪਿਕ ਸੰਘ ਨੇ ਫੈਸਲਾ ਲਿਆ ਹੈ ਕਿ ਆਉਣ ਵਾਲੇ 3 ਦਿਨਾਂ ਤੱਕ ਸੰਘ ਵੱਲੋਂ ਕਿਸੇ ਵੀ ਤਰ੍ਹਾਂ ਦੇ ਖੇਡ ਸਮਾਗਮ ਜਾਂ ਸਮਾਰੋਹ ਨਹੀਂ ਕੀਤੇ ਜਾਣਗੇ।
